BOSING

CIMT Vision Mission

Claretian Missionaries
Ormoc Mission

Claret Itinerant Mission Team (CIMT)

PANGLANTAW

Isip mga lig-ong kaabag sa Magbalantay sa Simbahan dinha sa Ministerio sa Pulong, kami, ang Claretian Missionaries Itinerant Mission Team, nangandoy sa usa ka Simbahang Lokal diin kami gipadala nga mamahimong tinuod nga Katilingban sa mga Sumusunod ug usa ka Simbahan sa mga Kabus nga mituman sa iyang katuyuan alang sa bag-o ug malangkubong pagsangyaw pinahaum sa iyang konkretong makasaysayanong kahimtang.

KATUYUAN

1. Isangyaw ang kinatibuk-an ni Kristo ug sa Maayong Balita sa kaluwasan ilabina ngadto sa mga kabus ug mga timawa.
2. Ipahiluna ang Gagmayng Simbahanong mga Katilingban (GSK) padulong sa usa ka malangkubon ug tawhanong kalambuan ug katilingbanong kabag-uhan.
3. Umolon ang mga Alagad aron mamahimo silang mga kasaligang magsasangyaw.

TUMONG

Ang kinauyukang tumong sa CIMT mao ang pagbulig sa Simbahang Lokal aron makab-ut ang binag-o ug malangkubong pagsangyaw. Mapatuman lamang kini sa “team” pinaagi niining mosunod nga mga buluhaton.
1. Mag-awhag sa mga tawo ug katilingban sa mga parokya kabahin sa
kinatibuk-ang pag-bag-o sa pagtuo.
2. Magtukod ug magbag-o sa mga Gagmayng Simbahanong mga Katilingban padulong sa kausaban.
3. Mag-umol sa mga Alagad.

Aron matuman ang maong mga tumong, ang CIMT mogamit ug mga
prinsipyo pinasikad sa mga batakang pamaagi sa Claretiano sa pagtuman sa misyon ug pakig-sandurot sa lokal nga Simbahan.
1. Makiglambigit sa Kura Paroko ug sa iyang pastoral nga katuyuan alang sa
kabag-uhan;
2. Makipamalandong sa mga tawo nga nagsagubang sa mga kamatuoran sa kinabuhi, mangita ug pamaagi sa pagtubag sa maong mga kahimtang, ug magpahiluna sa mga tumong aron mapatuman ang proseso sa pagsangyaw;
3. Pagbuhat ug mga sesyon kabahin sa Popular Evangelization ngadto sa mga katilingban uban ang madasigong pag-apil-apil ug hingpit nga pagtabang sa Kura Paroko ug sa mga sakop sa iyang parokya.



KALIHUKAN

Ang programa sa CIMT adunay upat ka bahin, pinasikad sa upat ka mga haligi sa binag-ong misyon sa katawhan.
1. Pasiuna sa Pagsangyaw: Pag-pasabot, Pag-pahiluna, ug Pagtapok sa mga impormasyon.
2. Panahon sa Pagsangyaw: Mas lalom nga Pag-usisa sa Katilingban, Pang-umol nga mga Pagtulon-an, etc.
3. Human ang Pagsangyaw: Training ug mga Seminar
4. Mapadayunong Pagsangyaw: Pag-umol sa mga Alagad